Psa 101 | YON | STEP | Dewid ye yook. God yaningko kankooni ye yook. Ne kuu eb womoniyiibban ye mimyob dowakeniib anammo wengyundiyiib ye dowad yook wingkaniin, o Yariman , ewaningko kankooni yook wingkaniin.

Psalms 101

Yook 101

Dewid ye yook. God yaningko kankooni ye yook.

1 Ne kuu eb womoniyiibban ye mimyob dowakeniib anammo wengyundiyiib ye dowad yook wingkaniin,
oYariman, ewaningko kankooni yook wingkaniin.
2 Ne kuu ongme kaadkereni ambarakmoon kii ande dedmoniyiibban ye kerekmen yaambed dobaraniin.
Komo aron arimbed ne yaa mananeeb?
Nambiwoom dobaraniin kuu
ne niindem aom ma aadikmiyiibbanbed dobaraniin.
3 Ne indob ari kuu karakiib arewa ye barang kuu
ma dowakeniib kerainban.
God yaa angkurom korokbeniwendan yi kamenabi yaa kuu kongendimain,
yi kuu ne ma nen kimyen wanaibban kii.
4 Inamen unitawiibdan kuu ne yaa kuu ambab angka keraniib,
inamen arewa korem kuu kangkadmaniin kui.
5 Kanembed ye dia doreenman yaa yemyeb wengamborokbanabaneen kuu
nembed ye kuu kebenenaniin.
Kanembed ye kuu nembedmo yimin ande kerengkan kamaneen kuu
nembed ye kuu angkodmenainban.
6 Ne kuu ne ambibkindan anam andiwen yaa karub amun ande kereknaniin,
kwananiine ne yoom dobaranuub.
Kane ye kuu ambarakmoon kii ande dedmoniyiibban ye kerekmen yaambed dobaraneen kuu
ne yaa awawaneen.
7 Karub kanembed ye kuu birandimaan kuu
nambiwoom kuu yeyiib dobaraanban.
Karub kanembed ye kuu dudanabimaan kuu
ne arinambo ari dobaraanban.
8 Ne ambibkin ye arewa kamenabidan kuu
amkimo korem kebenendaniin.
Nembed arewa kamenabidan korem kuu
Yariman ye siti aombed ben bunangka kiradmaniin.